Huishoudkunde en Appelpudding

It is alwer hiel wat jierren lyn dat ik yn Snits nei de Intas (interim algemene schakelopleiding) gong. En yn de twa jier dat ik dêr nei skoalle gie hiene we it fak 'huishoudkunde'. By de boekelist dy 't we krigen hiene stie ek in itensiedersboek en dat mienden mem en ik by de Hema te finen! Doe 't wy dermei thús kamen wie it fansels net it goede boek mar de titel wie wol ûngefear itselde. Stap-voor-stap koken is de namme fan dit boek en ik ha der miskien wol 20 jier neat mei dien. Mar doe 't ik út de hûs gong ha ik it wol meinommen en ik sjoch der de lêste jierren gauris yn want it stiet fol mei hiele lekkere âlderwetske Ingelske resepten. Sa ek it resept wat ik jim dizze kear jaan wol. It is it resept foar in neigesetsje; appelpudding.

Foar it basisbeslach hast 100 gram wytmoal, in mespuntsje sâlt, ien aai en trije dl molke nedich. En dit makkest earst want it beslach moat in heal oere stean foar it bakken!

Doch it wytmoal en it sâlt yn in kom, meitsje in kûltsje yn 'e midden en brek it aai dêr yn. Jit stadich de helte fan de molke by it aai en wurkje der mei in houten leppel it wytmoal fan de sydkant troch. Klopje dan mei de mikser de rest fan de molke der troch oant it in moai glêd beslach is en lit it 30 menuten stean!

Skyl dan 500 gram oan smotsappels, doch it klokhûs der út en snij de appels yn dikke plakken. Fetsje in ûndjippe fjoerfêste skaal yn mei ryklik bûter en waarmje dizze foar yn de ûne op 220 graden. Lis dan de appelplakken deryn en strui der goed wat brúne sûker oer en set de skaal dan 10 menuten yn de ûne. Kluts it beslach noch eefkes goed troch en jit it dan oer de appelplakken. Set de skaal werom yn de ûne en bak de pudding in dik heal oere (of mear) oant er moai rize en brún is. Strui der noch in bytsje gewoane sûker oer en set it daliks op tafel.

Om 't de pudding by ús langer nedich hie as in heal oere (baktiid) hiene de bern al wat oars hân en hawwe wy der tegearre oer te set west. En dat wie gjin straf dat sil ik jim wol fertelle.