Oarlochstaart

Dit resept krige ik lêsten fan immen dy't yn Wytmarsum by my oan de kofje mei taart siet. It wie frou Poelstra út Kûbaard. We hiene sa 'n praatsje oer resepten ensa. Se fertelde oer de taart dy 't se yn de oarloch makken doe 't der oars neat te krijen wie. Dizze taart wie doe noch wol te meitsjen foar boeren en arbeiders dy 't oan molke komme koenen.
Se hat foar my opneamt hoe 't sy de taart makke en sei dat har beppesizzers it no noch altyd lekker fine. Ik ha it yn myn tillefoan setten en hjoed ha ik de taart makke. Wy hawwe him iten as neigesetsje en it smakke goed. Asto dizze taart mei dyn jierdei krigest yn de oarlochsjierren dan wiest in geloksskiter. Ik set it resept hjir ûnder sa as ik it krigen ha. Mar ast op ynternet sikest op 'oorlogstaart' binne der ek wol oare fariaasjes te finen. Besykje it mar ris, soe ik sizze. Smaaklik. 

Wat hast nedich: 
bakblik 24 cm, beskúten, lange fingers, sjem, slachrjemme, hagelslach, molke, pakje (room)kookpudding

Lis de boaiem fan it bakblik fol mei beskúten. Meitsje dan de pudding sa as op it pakje stiet en jit dit oer de beskúten. Triuw dan de lange fingers yn de pudding en lit dit ôfkuolje.
As it goed ôfkuolle is dan dochst der in laach sjem oer, klopje dan de slachrjemme stiif en smar dat der ek oer. Meitsje de taart ôf troch der rûgeltsjes (hagelslach) oer te struien.

It alderlekkerst is de taart fansels mei eigenmakke pudding en selsmakke sjem. Mar foar minsken dy 't dat net ûnder de knibbel hawwe is boppesteande resept hiel goed te dwaan.

Understeboppe rabarbertaart

Der binne wat minsken dy 't rabarber op de tún hawwe en net goed witte wat se der allegear mei kinne/sille. Ik ha hjir al ris in neigesetsje mei rabarber op dit blog setten. En no dan in resept foar in ûndersteboppe rabarbertaart. Dan kinne jim allegear mar los yn de keuken. En binne der minsken yn de buert fan Wommels dy 't tefolle fan dat guod hawwe, dan witte jim no wa 't it wol hawwe wol :-)

Dit resept ha ik foarich jier út it tiidskrift Landleven helle. 

Foar de krommellaach
60 gram kâlde bûter
60 gram wytmoal
40 gram sûker
snufke sâlt

Foar de rabarberlaach
250 gram rabarber
50 gram sûker 

Foar de cake
150 gram wytmoal
1,5 tl bakpoeier
snufke sâlt
100 gram bûter op keamertemperatuer
100 gram sûker
heale tl sinesappelrasp
1 yl farsk parst sinesappelsop
2 aaien
125 gram soere rjemme

Waarmje de ûne op 175 graden foar. Meitsje de krommellaach troch it mei de fingers goed troch mekoar te mingen oant it krommels binne. Set it dan eefkes yn de kelder of kuolkast.

Fetsje de taartboaiem yn mei bûter. Ming de wosken en yn grutte stikken snijde rabarber mei de sûker en ferdiel dit op de boaiem fan de taartfoarm.

Seef boppe in kom de wytmoal, de bakpoeier en it sâlt. Doch yn in oare kom de bûter en de sûker en miks it oant it sacht is. Doch dan de rasp en it sinesappelsop derby en goed troch mekoar. Dan ien foar ien de aaien oant se goed opnommen binne. Dernei yn trije kear it wytmoalmingsel derby en dan de soere rjemme. Jit dit cakebeslach oer de rabarber en stryk it glêd. Helje dan de krommels wer foar it ljocht en griem dat der wat oerhinne. Bak de taart dan sa 'n sechstich minuten yn de ûne. Lit 'm in heal oere ôfkuolje en draai him dan om op in grutte skaal en lit fierder ôfkuolje. Ik soe sizze, genietsje derfan by in kopke tee yn de tún en yn it sintsje dan is it hielendal in feest.

Ik doch in stik bakpapier ûnder yn de bakfoarm want rabarber docht nochal in oanslach op de foarm. Ik brûk ek hieltyd deselde foarm foar rabarbertaart en as de rabarber op is dan goai ik de foarm yn it jiskefet.

De handige hurdfytser

De (kamping)fakânsje foar dizze simmer sit der wer op en it wie de wiken dat wy fuort wiene goed waarm. We hawwe dan ek in protte yn it skaad sitten en lêzen. Op in dei seach myn hurdfytser in man mei in stikken fytstsjil. De man stie by ús op de kamping en wie wakker wiis mei myn hulpfeardige Fryske hurdfytser (dy 't ek fytsemakker is). Hy helle in nije binnenbân en myn hurdfytser soarge derfoar dat alle fersnellingen der wer goed opkamen of soksewat. Ik ha der net sa 'n ferstân fan, dat sjogge jim hjir wol. De man wie sa bliid dat hy wer fytse koe dat hy by ús tinte delkaam mei trije bakken fruit. Heerlik, heerlik, heerlik! mar mei it hite waar moast it fansels wol gau op, dus ik oan it tinken wat we der allegear mei koene. Fansels skeat as earste my de Libelle simmertaart yn it sin, dêr kin hiel wat fruit op. Mar hoe moast de boaiem bakke ast net in ûne yn de tinte hast?

De hurdfytser (dy 't ek útfiner) is tocht mei en hie de oplossing: De safari chef brûke as ûne. Dit is ús nije kampingapparaat wêrst op wokke, bbq-e, grille en wat al net mear kinst. It blêddaai moast op de bakplaat sei er en de wokpanne der boppe op as deksel. En it wie in merakel mar sa'n oardel oere letter leine der 5 lytse boaiems klear om ôf te meitsjen mei mascarpone-smarsel en fruit. Dat de Plus yn Eijsden krekt gjin mascarpone te keap hie moast ek noch oplost wurde. Lokkich hiene se yn de kampingwinkel noch in beker biogarde/yoghurt en dat smakke ek bêst genôch. En it stie ek noch moai op ús 40 jier âlde oranje retro itenspannen. Hasto ek sa'n safari chef en wolst it ek ris besykje dan stiet it resept foar de taart hjir.

Simmertaart út de Libelle

Ik hie hjoed de Libelle fan buorfrou te lêzen en daliks op ien fan de earste bledsiden stie in simmertaart. It seach der frij maklik út en ik moast nedich wer wat #ferdivedaasjeopfreed hawwe dat ik ha it resept oerskreaun en de taart makke. En dit is hoe 't er wurden is ...

Wy hawwe hjoed lekker bûten iten en hiene klikjedei dus koe der wol in lekker neigesetsje komme. Der is net ien stikje oerbleaun sa lekker wie de taart. We ha hjoed ek in útfanhúzer dy 't lang net altyd alles lekker fynt mar hjir hat er 2 stikken fan hân. Lekker mei slachrjemme.

Foar wa 't de Libelle net hat is hjir it resept:

Foar de boaiem:

6 plakjes boerebûterblêddaai 

1 yl wytmoal

1 aai

3/4 yl sûker

Folling:

250 gr mascarpone

2 sekjes fanillesûker

siedsjes fan 1 fanillestokje

500 gram read fruit

munt of basilikumblêdsjes en poeiersûker

Ferwaarmje de ûne op 175/180 graden. Stappelje it blêddaai, strui wat wytmoal op dyn wurkblêd en rôlje der in moaie lape fan. Bytsje bijsnije, bestrike mei klutst aai en mei in foarke der gatsjes yn prikke. Dan de sûker der oer struie en dan op in stik bakpapier op de bakplaat de ûne yn. In menuut as 25/30.

Ofkuolje litte en dan de folling meitsje. Klopje de mascarpone mei de sekjes fanillesûker en de siedsjes fan 1 fanillestokje troch mekoar. Stryk dat oer de ôfkuolle boaiem. Ferdiel dan de reade fruchten oer de taart en lekker ite. Ofmeitsje mei poeiersûker en blêdsjes

Hoera foar de nije kening

Ik fyn it wol in spesjale dei no 't Willem Alexander kening wurden is. En op in spesjale dei fyn ik it ek nedich om wat lekkers by de kofje te nimmen. Mar der siet neat mear yn de kast of kelder. By de moarnskofje hiene we de lêste stikjes rabarbertaart noch opiten. Lokkich kaam ik der oan 'e ein fan de moarn achter dat der gjin koeken wiene en wie der noch tiid om sels wat te bakken. Dat is in foardiel fan sa 'n taartebakhobby, jo hawwe eins altiten wol basisingrediinten yn de hús. 

Earst in biscuitbeslach meitsje, bakke en ôfkuolje litte. Dernei ha ik 'm opmakke mei it blikje manderijntsjes dat ik noch stean hie.
En tatatataaaaaa ...... it smakke lekker by de kofje.

Hoera foar de nije kening.